Фүжи уул бол бидний сайн мэдэх Япон улсыг төлөөлдөг алдартай галт уул билээ. Энэхүү уул нь үзэсгэлэнтэй харагдцынхаа ард яг ямар нууцыг өөртөө агуулж буйг олж мэдэцгээе.
🗻 Фүжи уулын нас, үүсэл:
Фүжи уулыг анх тектоник хавтангуудын зөрлөгөөр 2.6 сая жилийн хугацаанд үүссэн бөгөөд анхны дэлбэрэлт ба оргилууд 700,000 жилийн өмнө үүссэн байх магадлалтай гэж геологичид тооцоолсон байна. Харин 100’000 жилийн тэртээ хэд хэдэн галт уулын тэсрэлтийн магмын нийллэгээс одоогийн бидний харж буй Фүжи уул бүтжээ. Тус уул нь одоо ч идэвхтэй галт уул гэж тооцогддог ба хамгийн сүүлд 1707 оны 12-р сарын 16-нд дэлбэрсэн ба 1708 оны 1-р сарын 1-ний өдөр унтарсан байдаг. Уг дэлбэрэлтээр шинэ тогоо үүсэж, зүүн өмнөд талын хагаст нь Хоэй уул хэмээх хоёр дахь оргилыг үүсгэсэн гэж үздэг. 300 гаруй жилийн тэртээ дэлбэрсэн энэхүү идэвхтэй галт уул нь дахин хэзээ дэлбэрэх нь мэдэгдэхгүй байгаа аж. Гэвч 2011 оны 3-р сарын 15-ны орой Фүжи уулаас өмнөд хэсэгт хэдхэн километрийн зайд 6.2 магнитудын хүчтэй газар хөдлөлт болсон.
